夕陽之歌/關夢南

我還沒有準備好
你就給了我生果金
過了一年
又加幾十幾
都唔好話政府唔好

之不過如果打風
蔬菜貴到二十四蚊斤
過年兩斤幾雞
賣三百七十蚊一隻
唔食新鮮雞
雪雞其實是另一種選擇
唔好怨 有人飲紅酒
有人就飲孖蒸

街坊話最近對面
又開了一間兩菜飯
每盒二十八蚊
這樣我和老婆
每日兩餐又有數

退休的士佬瘋傳
隔離果間齋鋪
逢初一十五有飯盒派
外加兩個橙一盒口罩

老婆問去
去排隊?
我話咁多凳仔暖水瓶報紙
點同人吵架打尖生氣爭位?

如慳慳地慢慢搣剩低呢光陰
早茶還可以撑下枱脚
一盅兩件 嘆埋頭條添

唔使預留棺材本咩?
唔使,你睇前頭房九伯
昨日剛剛伸直雙脚
救傷車即刻嗚嗚送左去廣華
社工随即跟到貼
叫點個例牌火葬全餐啦!
合共一萬三千幾
又係福利署找數

真係醉酒佬數街燈
都唔知幾盞!
老伴 你話呢?


(影像由余加希提供)